घर री राड़
=======
मा सिखाई सेवा
मायतां री
मा रा मायत
मा रा सासू-सुसरा
म्हारा दादो-दादी
मा घणीं ई करती चाकरी
पण डरती
नीं होई गळती सूं
पछै तो होयां ई सरती ।
मा री
गळती माथै
होंवतो घर में गोधम
सांकडै़ आंवता पिता जी
बोलतां ही हो जांवता मून
आ सुण
ल्यो ले ल्यो
इण रो तो वकील भी है
आप रै बाप माथै गयो है
दादी हांसती
मा भी हांस जांवती
बस इयां मिट जांवती
घर री राड़ ।
म्हनै लागतो
बडेरा कदै ई
राड़ नीं करै
बाड़ करै घर रै ।
