मा !
थूं तो कैंवती
हरमेस
करना है पीळा
म्हारा हाथ
म्हारा तो
काळा होग्या
मांजतां-मांजतां बासन !
देख
काळी हथाळी में
कित्ती भूंडी लागै
धोळी भाग-रेख !
मा !
घर पळट्यो है
भाग तो
साथै ई आग्या !
रविवार, 21 अक्तूबर 2012
*भाग-रेख*
मा !
थूं तो कैंवती
हरमेस
करना है पीळा
म्हारा हाथ
म्हारा तो
काळा होग्या
मांजतां-मांजतां बासन !
देख
काळी हथाळी में
कित्ती भूंडी लागै
धोळी भाग-रेख !
मा !
घर पळट्यो है
भाग तो
साथै ई आग्या !
*म्हारी आस*
रातीजोगै में
मावड़्यां जी रा गीत
आखी रात
म्हैं गाया ।
मोटो रोट सेक
चूर चूरमो
भोग म्हैं लगायो
ठाकुर जी रै ।
आस माता रा
बरत म्हैं कर्या
फेर ई
फळ मिल्या भाई नै
म्हारी आस
क्यूं नीं पूरी देवां ?
*मा अर म्हैं*
मा कद झलाया
सगळा बरत
ठाह नीं पण करूं
म्है नेम सूं
बरत री कथावां
मां रै कंठां निकळ
कद बैठगी म्हारै कंठां
है ज्यूं री ज्यूं
ठाह ई नीं पड़ी !
जित्ता गीत
मा नै आवै
बित्ता ई
आवै म्हनै
बियां ई जुड़ै जाड़ा
बियां ई दूखै माथो
बियां ई चालै
पगां में रीळ
बियां ई जीम्मूं
सगळां रै जीम्यां पछै !
मा !
थूं कद बैठगी
आय'र म्हांरै भीतर
है ज्यूं री ज्यूं ?
*म्हैं हांसी ही*
1.
घर सूं गळी
गळी सूं गांव
गांव सूं ठाह नींठाह नी कठै-कठै
भंवै भाई
सिंझ्या
उण सूं पैली पूगै
गांव रा ओळमा
समूळो घर
ऊभो दीखै भाई साथै
भाई रै कूड़ माथै
न्हाख धूड़
ओळमा बूरतो !
म्हैं हांसी ही
गळी में
फगत एक दिन
बांदर-बांदरी रो
खेल देखतां
जा पछै
बंद है
म्हारै घर री
बाखळ रो बारणों
अणमणां है
घर रा सगळा
उण दिन रै बाद !
सदस्यता लें
संदेश (Atom)