गुरुवार, 21 मार्च 2013

घर री राड़


घर री राड़
=======

मा सिखाई सेवा
मायतां री
मा रा मायत 
मा रा सासू-सुसरा
म्हारा दादो-दादी
मा घणीं ई करती चाकरी
पण डरती
नीं होई गळती सूं
पछै तो होयां ई सरती ।

मा री
गळती माथै 
होंवतो घर में गोधम
सांकडै़ आंवता पिता जी
बोलतां ही हो जांवता मून
आ सुण
ल्यो ले ल्यो
इण रो तो वकील भी है 
आप रै बाप माथै गयो है
दादी हांसती
मा भी हांस जांवती
बस इयां मिट जांवती
घर री राड़ ।

म्हनै लागतो
बडेरा कदै ई
राड़ नीं करै
बाड़ करै घर रै ।

म्हैं तुळछां हूं थारै आंगणै री


म्हैं तुळछां हूं थारै आंगणै री
=================

आज मा रो फ़ोन आयो
मा बतायो-
लारली दीयाळी 
परणीजगी बा तुळछां
जकी थूं लगाई
आपणैं घर रै आंगणैं
परणीज्यां पछै
तीन मईना हरी रैई
कोई नवी काढी ई नीं डाली
नीं लाग्या नवा पानका
जूनी डाळ्यां माथै
जरूर आया मोर
बा तो बळगी जा पछै 
थारा सुणा
काईं हाल है !

म्हारा तो
बुसका ई फ़ाट्या
सबद दोरा ई डाट्या
"मा म्हैं तुळछां हूं थारै आंगणै री"
इत्तो ई बोलीज्यो
अर मा फ़ोन काट दियो !

बा मिठास कठै


बा मिठास कठै
==========
घर तो घर हो
म्हारो घर
घर में ई रैई
चौबीस बसंत
जठै कद हो
सुखां रो अंत ।

जद कदै ई 
निकळती घर सूं
मा पापा जी
भाई अर बाई री
कई जोडी़ आंख
घर सूं ई
लारै चालती
जकी रुखाळती
म्हारो मारग 
कित्तो मिठास हो
बां आंख्यां में ।

घर तो
आज भी है
घर री मालकण भी
म्हैं खुद हूं
पण कठै बा बात
दिखै ई कोनीं अठै
जकी लारै छूटगी
बा मिठास कठै
अठै री आंख्यां में ।

रविवार, 21 अक्तूबर 2012

*भाग-रेख*


मा !
थूं तो कैंवती
हरमेस
करना है पीळा
म्हारा हाथ
म्हारा तो
काळा होग्या
मांजतां-मांजतां बासन !

देख

काळी हथाळी में
कित्ती भूंडी लागै
धोळी भाग-रेख !

मा !

घर पळट्यो है
भाग तो
साथै ई आग्या !

*म्हारी आस*



रातीजोगै में
मावड़्यां जी रा गीत
आखी रात
म्हैं गाया ।

मोटो रोट सेक
चूर चूरमो
भोग म्हैं लगायो
ठाकुर जी रै ।

आस माता रा
बरत म्हैं कर्‌या
फेर ई
फळ मिल्या भाई नै
म्हारी आस
क्यूं नीं पूरी देवां ?

*मा अर म्हैं*


मा कद झलाया
सगळा बरत
ठाह नीं पण करूं
म्है नेम सूं
बरत री कथावां
मां रै कंठां निकळ
कद बैठगी म्हारै कंठां
है ज्यूं री ज्यूं
ठाह ई नीं पड़ी !

जित्ता गीत
मा नै आवै
बित्ता ई
आवै म्हनै
बियां ई जुड़ै जाड़ा
बियां ई दूखै माथो
बियां ई चालै
पगां में रीळ
बियां ई जीम्मूं
सगळां रै जीम्यां पछै !

मा !
थूं कद बैठगी
आय'र म्हांरै भीतर
है ज्यूं री ज्यूं ?

*म्हैं हांसी ही*


1.

घर सूं गळी
गळी सूं गांव
गांव सूं ठाह नीं
ठाह नी कठै-कठै
भंवै भाई
सिंझ्या
उण सूं पैली पूगै
गांव रा ओळमा
समूळो घर
ऊभो दीखै भाई साथै
भाई रै कूड़ माथै
न्हाख धूड़
ओळमा बूरतो !

म्हैं हांसी ही

गळी में
फगत एक दिन
बांदर-बांदरी रो
खेल देखतां
जा पछै
बंद है
म्हारै घर री
बाखळ रो बारणों
अणमणां है
घर रा सगळा
उण दिन रै बाद !